CEBU, Philippines - Mag-atubang karon sa imbestigasyon ang usa ka Aviation police human kini gikatahong nakaangol sa usa ka 13-anyos dihang kini mipabuto sa iyang armas atol iyang pakig-away sa usa ka drayber sa jeepney diha sa Zone Tangkong barangay Paknaan dakbayan sa Mandaue kagahapon sa hapon.
Ang gipasanginlang nakaigo sa bata mao si PO1 Carlito Donque, residente sa maong dapit ug sakop sa Philippine Center for Aviation Security (PCAS) 7 nga nadestino sa Mactan-Cebu International Airport.
Ang biktima mao si Kevin Jay Tarona Tuñacao, 13, residente sa maong dapit daling gidala sa tambalanan human maigo sa saag nga bala diha sa iyang likod.
Sa pakighinabi sa Banat News ni Sr. Insp. Rex Lomente sa Investigation Detective Management Branch sa Mandaue City Police Office nasayran nga mga alas 2:30 kagahapon sa hapon nagkalalis ang maong polis ug ang silingang si Balbino dela Cruz, 39.
Matud pa ni Lomente nasuko si dela Cruz sa maong polis tungod kay giingong gipasiritan niini og insect spray ang mata sa iring niini. Kini maoy hinungdan sa ilang panaglalis.
Ang panaglalis misantop sa pagsinukmagay sa duha ug giingong nianang tungora naibot ni Donque ang iyang armas ug gipabuto kini.
Dihang giimbestigar ang maong polis sa IDMB giingong nangangkon kining igo ra siyang mipasalba sanglit buot siyang patyon ni dela Cruz apan wala damhang bisan sa ubos niya kini gipabuto mibanda ang bala ngadto sa likod sa bata.
Si Donque mismo ang midala sa biktima ngadto sa Mandaue City Hospital ug iya kining giatiman diin siya naabtan sa mga sakop sa IDMB ug gipaubos kini sa imbestigasyon. - (BANAT NEWS)