Gitudlong co-sponsor sa Anti-Tabloid ordinance may pagduda

CEBU, Philippines - Wala pa gani mapanday ang planong paghimo og ordinansa kontra mga gagmay’ng pamantalaan o tabloids wala na kini dayon makakuha og maayong reaksyon. 

Kini human mismong si Bokal Jose Ribomapil Holganza, Jr. nagduda sa legalidad sa giduso nga “Anti-Tabloid Ordinance” ni Bise-Gob. Agnes Magpale.

Kini ang hinungdan sa iyang pagdumili nga mahimong co-sponsor sa balaudnon bisan sa iyang pagdayeg sa paningkamot ni Magpale nga mapanalipdan ang katungod sa kababayen-an isip co-chairman sa Provincial Women’s Commission. Si Holganza kinsa maoy chairman sa committee on human rights mipadayag nga hayan daghan malapas nga katungod kung masayop ang pagsabot sa mga probisyon sa maong balaudnon.

Matud pa ni Holganza nga gidawat na nga paagi sa negosyo sa mga basahon ang pagbutang og mga hulagway sa kalalakin-an ug kababayen-an sama sa mga billboards ug mga kalendaryo.

Ang pagdili nga mapublikar ang mga seksi nga hulagway sa mga basahon, sama usab nga idili ang pagsul-ob sa mga swimwear diha sa mga pangpubliko o pribadong beach resorts.

“I believe that the state has the right to regulate the exercise of civil rights but I also believe that legislated morality is step back in time that the Taliban in Afghanistan would applaud,” dugang pa ni Holganza.

Wala hinuon gitumbok sa ordinansahon kung unsa nga tabloid ang idili na nga ipabaligya sa kalungsuran.   - (BANAT NEWS)