CEBU, Philippines - Sa kombento naligo ang usa ka madre dihang;
Padre Bitoy: Nay tawo sa CR?
Senyang: Ako Padre naligo ko, pwede magpalugod.
Padre Bitoy: Aguy! Ginoo ko dili na pwede oy.
Senyang: Ah para lugod lang Pads.
Kalit lang misulod si Padre Bitoy sa CR:
Senyang: Oy ingon ka Pads dili pwede nisulod man lagi ka.
Padre Bitoy: Paingon man gud dinhi si Monsenyor.
Senyang: Ah! hadlok ka makit-an?
Padre Bitoy: Dili! Hadlok ko maunhan.(Toink!)
Hehehehehehehehe
Peace Father! Ehemplo lang ni sa usa ka sitwasyon nga naghulagway sa kakuwang sa pagsalig nga usa sa labing importanteng elemento pagbaton og tiunay nga pagtuo.
Sa homiliya ni Padre Rodolfo Bugna sa iyang misa gahapon sa udto sa Basilica del Santo Niño ang DAT kon KAP sa binisaya pa ang labing lig-on nga templada pagsemento sa imong pagtoo.
Kay unsa man diay nang DAT?
Dili ni ang Dat ha nga nagpasabot og “digital recording of sound”. Ang DAT nga gipasabot ni Padre Bugna mao ang acronym sa pulong Determination, Action and Trust sa binisaya pa Kalig-on, Aksyon ug Pagsalig.
Sa diwanhon nga aspeto dili nimo masiguro ang kaligdong sa imong pagtuo kun dunay absent ining tulo ka kalidad.
Ang ebanghelyo gahapon naghisgot sa usa ka babaye nga dili Israelita nga miduol ug nangayo og tabang ni Hesukristo nga bisan sa pag-abog kaniya sa mga disipolo, nga bisan sa wala pagtagad ni Hesus sa iyang gipangayo wala molunga sa iyang tinguha.
Hinunoa ang babaye nga giingnan ni Hesus nga “dili maayo nga ang pagkaon sa mga bata ilawog sa iro” nakapakita sa iyang talagsaong pagtoo pinaagi sa pagtubag, “ Bisan ang mga mumho nga mahulog sa lamisa sa agalon makaon usab sa mga iro”.
Ang dakong pangutana, sa administrasyon karon ni Presidente Benigno “Noynoy” Aguino III nga gisaligan sa kinabag-ang Pilipinhon, kompleto kaha ang DAT kon KAP sa mga mituo sa iyang pamunoan?
Sa atong tagsa-tagsa ka pamilya kompleto ka ha ang DAT kon KAP sa atong pagtuo sa matag sakop sa atong pamilya?
Ingon ba kaha ka kompleto sama sa pagtuo sa paganong babaye ang atong pagtuo sa Labaw nga Makagagahum?
Mga pangutana nga ang imo rang kaugalingon ang makatubag.
Apan ang dakong kahayag nga akong nakita sa wali ni Padre Bugna gahapon ang kahigayonan sa tanang mitambong pagtuhog sa mensahe.
Abilidad sa pagsangyaw nga gihuptan usab sa ubang kaparian apan dili ikalimod nga wala usab sa uban.
Kakulangan nga inay makatabang pagpalig-on sa pagtuo makapawala hinoon sa interes sa pagsimba.
Sama ining pari ug driver nag-abot sa ganghaan sa langit.
San Pedro: Driver nia imong yawe sa 5 star hotel nga imong estahan dinhi sa langit.
Padre Bitoy: Ang ako Nyor.
San Pedro: Nia ra ang imong yawe padre pero 1 star hotel ra na.
Padre Bitoy: Ha! Nganong sa driver 5 star man ako hinoon pari 1 star ra?
San Pedro: Sa kalibotan pa man gud mo padz kutob sa mosakay sa sakyanan atong driver mag-ampo gyud pero sa imong misa daghan ang matulog.(Toink!)
Hehehehehehehehehe
* * *
(emailad:Jomar_bellita@yahoo.com)