Mga tigpautang nga

CEBU, Philippines - Indian way salig sa polis?

Mga Indian national giawhag sa officer-in-charge sa Talisay City Police Station nga moduol sa ilang buhatan kung ugaling duna kini mga hulga sa ilang kinabuhi o mabantayang tawo nga kadudahan ang lihok nga magsunod-sunod kanila.

Kini gumikan sa kadaghan na sa mga insidenteng nabiktima sa mga tulis ang mga Indians apan dili modangop sa ilang buhatan sa walay igong rason.

Si Chief Inspector Eddie Recamara, OIC sa TCPS miawhag sa mga Indians nga sagad nalambigit sa negosyong pautang og kwarta ug mga gamit nga di magmakuli pagdangop kanila kung aduna sila’y problema sa seguridad.

 “Akong awhag nila nga kung duna sila’y threat sa ilang life dili sila magpanuko og ari sa police station kung makabantay na sila nga gisundan na sila para mangayo og police assistance, ako nay mi-offer nila nga kung duna sila’y treat sa ilang kinabuhi moari lang sila (police station)”, ni Recamara pa.

Dili palang dugay gitulis ug gipusil patay si Raja Singh 37, nga usa ka Indian nga tigpautang diha sa barangay Mojon niadtong Miyerkules sa hapon.

Nadakpan hinuon dayon ang mga tulisang sila si Rutchel Alcover ug Jeriel Sembrano nga giingong mga ex-convict ug parehong residente sa maong barangay. Pipila na ka mga buwan ang nakalabay laing Indian ang gipusil sa duha ka lalaki kinsa gituohang mga tulisan apan ang biktima wala kini mopasaka og kaso batok sa mga mipusil kaniya.

Gawas sa maong mga insidente duna pay mga Indian national ang nabiktima sa mga pagpanulis apan mas gipili nilang di nalang modangop sa mga polis. (BANAT NEWS)