CEBU, Philippines - Napanglantawan ni Mayor Michael Rama nga dili makaapekto sa Ciudad project ang pag-resign ni Kalihim Alberto Lim sa Department of Tourism.
Si Lim una modimeter sa katungdanan mibisita dinhi sa Sugbo sa miaging adlaw ug partikular niyang giduaw ang site o lugar nga tarokan sa Ciudad Project. Si Lim mipadayag kinsa kutob nalang sa Agosto 30, 2011 sa iyang katungdanan mipadayag sa iyang suporta sa maong proyekto ubos sa kondisyon nga kompletohon niini pagtuman ang tanang paginahanglan nga gisita sa balaod.
Gitataw ni Lim nga makatabang sa imahe sa turismo ang Ciudad project sanglit makadani kini og daghang bisita nga makatabang usab sa dagan sa ekonomiya sa Sugbo.
Sa habig ni Mayor Rama, iya na kining gitugyan ngadto sa City Attorney’s Office apan iyang giklaro nga wala’y problema alang kaniya ang nahisgutang proyekto basta tumanon lang niini ang gimando sa balaod.
Ang City Attorney’s Office una nga mipadayag kaniadto nga wala’y problema ang maong proyekto sanglit wala kini nakalapas sa Cebu City Zoning Ordinance ug gihulagway kini nga “public use” ang nahisgutang proyekto ug makahatag og oportunidad sa trabaho alang sa mga Sugboanon.
Ang developer sa maong proyekto nga mao ang Fifth Avenue Development Corporation mipasalig nga makatabang sa pagpalambo sa turismo ang Ciudad Project sanglit ang desinyo niini susama og dagway sa karaang mga edipisyo sa karaang panahon nga kompleto usab sa department store, kan-anan, museum ug uban pa.(WC) (BANAT NEWS)