CEBU, Philippines - Duha ka gipasanginlang notadong tigpayuhot og ginadiling drugas sa lungsod sa Argao ang nasikop sa buy-bust operation nga gilusad sa kapulisan sa sitio Suba sa barangay Poblacion lungsod sa Argao niadtong Biyernes sa alas 5:30 sa hapon.
Ang mga nasikop mao sila si Lexel Kintanar Kiamko alyas Lecto,37,molupyo sa sitio Malacarong barangay Usmad sa bukirang bahin sa Argao ug ang kauban niini nga si Nicanor Abobo Parantar alyas Pacio,40, nagpuyo sa sitio Suba Poblacion.
Nakuha gikan sa ilang posesyon ang usa ka sachet nga gituohang dunay sulod nga shabu atol sa buy-bust operation og P500 nga marked money nga gigamit sa poseur buyer ngadto ni Parantar.
Samtang laing pito ka plastik sa sachet nga duna gihapoy sulod nga gidudahang shabu ang nakuha sa mga polis gikan ni Kiamko ug ingon man usa ka kalibre .45 nga pistola nga dunay usa ka magazine nga may pito ka bala.
Matud ni PO2 Bobby Naces sa Argao Police Station dihang nahinabi sa Banat News ang hepe nila nga si Insp. Alejandro Batobalonos maoy nangulo sa operasyon human gidungog ang duha nga maoy tigpayuhot og ginadiling drugas sa maong mga lugar.
Si Parantar maoy unang nadakpan human kini motunol og usa ka paketeng shabu sa poseur buyer.
Tungod sa komosyon daling misusi si Kiamko apan gisugat dayun kini sa mga polis ug dihang girekisa nakuha gikan kaniya ang usa ka gamay’ng kahon nga may sulod nga shabu ug ang kalibre .45 nga armas.
Ang mga suspek nagtingkagol na karun sa karsel samtang gihikay ang kasong pagpayuhot og gidiling drugas nga ipasaka batuk nila. (BANAT NEWS)