Laing barko sa Trans Asia makabiyahe na

CEBU, Philippines - Laing barko sa Trans Asia Shipping Lines Inc. ang gilibkas gikan sa suspensyon ug gitugutang makabalik og biyahe sa Maritime Industry Authority (MARINA)-7 sukad kagahapong adlawa.

Ang tigpamaba sa MARINA-7 Jose Cabatingan mibutyag dihang nahinabi sa Banat News nga sukad kagahapong adlawa lima na ka mga barko sa Trans Asia ang gilibkas ang suspension order.

Ang maong mga barko nakapasar sa re-inspection sa MARINA-7 ug ang labing uwahi mao ang M/V Asia Pacific nga usa ka cargo vessel niadtong niaging adlaw.

Ang unang upat ka barkong gitugotang makabalik og biyahe mao ang M/V Trans Asia-5, M/V Trans Asia-3, M/V Trans Asia-2 ug M/V Asia Indonesia.

Matud ni Cabatingan duna nalay duha ka nahabiling barko ang ilang inspeksiyonon nga mao ang M/V Trans Asia ug ang M/V Asia China ug kung sila makapasar awtomatiko silang malibkas gikan sa suspensyon.

Ang re-inspection sa mga barko sa Trans Asia gimando sa ulohang buhatan sa MARINA dungan ang pagsuspenso sa tanang operasyon niini human sa pagkalunod sa laing barko niini ang M/V Asia Malaysia sa kadagatan sa Iloilo sa milabay’ng pipila ka semana. (BANAT NEWS)