Pagtugot sa CHED-7?

CEBU, Philippines - Matud pa ni Cañete nga daghan pa nga mga tulunghaan sa kalungsoran nga gipadagan ubos sa lokal nga kagamhanan wala pa makabaton og pagtugot sa CHED- 7 aron mahimong legal ang ilang operasyon ug natingala siya nganong gi-single out lamang ang MCC nga iyang gidumala.

Gani ang mga gradwado sa maong campus gidid-an nga makakuha og pasulit sa Professional Regulation Commission-7 nga wala buhata ngadto sa mga tinun-an sa ubang mga tunghaang adunay susamang problema kanila.

Base sa maong dokumento nga linagdaan ni CHED-7 Director Amelia Biglete nga tubag sa sulat ni Jeffbeck Oca sa legal affairs department sa MCC-Tipolo Campus nagpakita nga adunay mga tulunghaang gipadagan sa mga lokal nga kagamhanan nga wala pa makabaton og authority to operate.

Kining mga tunghaana nag-operate na bisan paman sa kakulang sa maong awtorisasyon apan sila pulos na nakasumitir og aplikasyon diha sa CHED-7 kabahin sa ilang tinguha. Naglakip sa maong mga tulunghaan diha sa maong dokumento mao ang Cordova Public College sa lungsod sa Cordova, Sibonga Community College sa lungsod sa Sibonga, Lapulapu City College sa dakbayan sa Lapulapu, Talisay City College sa dakbayan sa Talisay ug Trinidad Municipal College sa Trinidad, Bohol.

Hinuon kining maong mga tunghaana pulos suportado sa ilang mga konseho dili susama sa nahitabo karon sa MCC-Tipolo nga wala paluyohi sa konseho sa dakbayan sa Sugbu ug adunay pending nga kaso diha sa korte pagresolbar niini.

Ang MCC- Tipolo Campus pasirad-an karong Agosto 26 sa CHED-7 apan si Atty. Achilles Cañete nga maoy abogado sa maong tunghaan nagkanayon nga mahimo lang kini kung panahon karon sa Martial Law. (BANAT NEWS)