Tungod sa plaka sa motor tulisan tiklo

CEBU, Philippines - Tulo ka tulisang nakatulis og dul-ang P1,000 gikan sa usa ka panaderia   sa dakbayan sa Mandaue sa miaging buntag nadakpan didto sa dakbayan sa Lapulapu pipila ka takna human sa maong pagpanulis tungod kay nakuha sa biktima ang plate number sa motorsiklo nga gisakyan nila sa ilang pagpanulis.

Ang mga naposasan ug mikagulkol na karon sa prisohan mao sila si Mario Casio, 29: Alvin Ceniza,alyas Patoc, 33; ug Lauro Chato, 41, pulos   minyo ug pulos nagpuyo sa sitio Sac, barangay Buaya, sa dakbayan sa Lapulapu .

Ang ginganlan og Titing nga tag-iya sa balay nga giingong suyopanan og shabu sa mga adis-asdis sa maong dakbayan diin hidaklapi ang mga suspetsado, wala masikop sa kapolisan kay nakasibat.

Si Insp. William Abot sa kapolisan sa dakbayan sa Mandaue miingon nga alas 5:00 pasado ang takna sayo sa miaging buntag ilang nadawat ang alarma sa pagtulis sa Julies Bakeshop sa dalan Plaridel sa barangay Umapad sa dakbayan sa Mandaue.

Ang baker nga si Rodulfo Tampili, 18, nga ilang gisukitsukit miingon nga tulo ka wala hiilhing lalaki nga nagsakay og motorsiklo atubangan sa bakery ug usa kanila nagpakaaron-ingnon nga customer.

Dihang gitagad kini sa cashier, misulod    og kalit ang iyang duha ka kauban sa bakery ug gipanionan sila   sa mga armas de fuego niini uban sa pagdeklarar nga tulis.

Gikuha sa mga tulisan ang salapi   gikan sa kaha sa kahera nga nagkantidad og P930 uban ang cellphone sa biktima dayong sibat pahilayo nga nagsakay sa blue nga motorsiklo.

Maayo nalang kay nakuha sa biktima ang plate number sa motorsiklo ug gihatag nila sa kapolisan kinsa mihimo usab dayon og pakisusi sa buhatan sa Land Transportation Office sa pag-ila sa rehistradong tag-iya sa maong plate number.

Matud pa ni Insp. Abot nga human nila masuta ang   tag-iya sa motorsiklo ug address niini, miadto dayon sila sa balay niini sa sitio Sac diin naabtan nila didto ang maong motorsiklo ug ang tulo ka suspetsadong tulisan nga maoy nagsakay niini nga nagsuyop og shabu.

Matud pa ni Insp. Abot nga diha-diha giposasan dayon nila ang tulo ug gisakmit ang duha ka paketeng shabu, mga kahimanan sa paggamit niini , ug ang armas nga kalibre. 38 nga nga may upat ka mga buhing bala.

Nagkagulkol na karon sa detention cell sa Presinto 5 sa Opao Police Station sa Mandaue City Police Office (MCPO) ang mga dinakpan samtang padayon pang giandam ang kaso nga isang-at batok kanila.  - BANAT NEWS