Hustisya alang sa 5-anyos idlas

CEBU, Philippines - Naglisod karon sa pagpasaka og kaso ang kapolisan ug social welfare sa dakbayan sa Mandaue batok sa usa ka babaye nga giingong midagmal sa 5-anyos nga bata kinsa namatay sa tambalanan tungod sa pag-atras sa duha nila ka testigo.

Ang Mandaue City Police Office (MCPO) ug Department of Social Welfare Service sa Mandaue mopasaka na unta og kaso kagahapon sa buntag apan matud pa sa social welfare officer nga si Puriza Tabuac mi-atras ang ilang mga testigo.

Si PO1 Diane Magbanua sa Women and Children’s Desk sa MCPO mipadayag nga andam na unta kagahapon ang tanang mga affidavit sa mga testigo aron mapirmahan ug mapasaka ang kaso batok sa ina-ina sa bata nga 18-anyos kinsa gawasnon hangtod ning pagbalita.

Matud pa ni Tabuac katapusan nilang panag-estorya sa duha ka mga saksi nagdumili sila sa pag-apil apil sa kaso tungod kuno sa hangyo sa ilang mga paryente.

Atol sa pag-atubang ni Magbanua ngadto ni Fiscal Felixberto Geromo sa Mandaue City Prosecutors Office kini gitambagan nga papangitaon sila og laing saksi nga nakakita sa bata nga gidagmalan sa suspek.

Ang maong bata dihang gidala sa presinto sa apohan naputos og bun-og ug gihulagway sa mga polis nga daw nalisoan na og pangisip tungod sa pagmaltratong nadawat gikan sa suspek sanglit nagkatawa lang kini.

Apan matud pa ni Magbanua dili paigo ang mga resulta sa laboratory test ug death certificate aron mahatagan og hustisya ang bata.

Ang amahan ug apohan sa bata desididong mopasaka og kaso batok sa suspek kinsa bisan paman sa mga hulga sa gikan sa mga kabanay sa suspek nga naghulgang ikiha siya tungod sa giingong iyang paglugos sa suspek kinsa minor de edad pa ug karon namabdos na og pito ka bulan. (BANAT NEWS)