Kapolisan nag-amotay para reward

CEBU, Philippines - Magtampo-tampo sa P50 mil nga salapi ang kapolisan sa probinsya alang sa reward system sa suspetsadong si Bella Ruby Santos kinsa padayong gipangita sa mga otoridad karon.

Kini ang gipahibawo kagahapon ni Sr. Supt. Patrocinio Comendador, tigpamaba sa Task Force Ellah Joy Pique kinsa mibutyag nga walay misupak sa iyang mga sakop sa maong sugyot atol sa gihimo nilang staff conference.

Matud ni Comendador nga kining P50 mil maoy ilang iganti niadtong makatug-an sa nahimutangan ni Santos karon nga magganoy sa pagdakop kaniya. Matud pa ni Comendador nga pinaagi niini nagtuo siya nga may mga tawong madasig sa pagsuporta sa lakang sa kapolisan pagdakop sa suspetsadong midagit ug mipatay kang Ellah Joy Pique, 6, didto sa barangay Calajoan, lungsod sa Minglanilla niadtong Pebrero 8, 2011.

Gipasabot usab ni Comendador nga dili kaayo bug-at sa mga kapolisan ang kantidad n ga iamot nila tungod kay gibanabana niya nga labing dakong matampo sa matag polis mao ang P300. Si Comendador miingon nga ang buhaton lang ni kinsa mang buot moangkon sa maong ganti mao ang pagtawag o kaha pag-text sa hotline nga 0918-827-7600 sa pagpahibawo sa nahimutangan ni Santos aron kini masikop sa kapolisan.  - BANAT NEWS