Driver sa PUJ gipisat sa acacia

CEBU, Philippines - Namatay diha-diha ang drayber sa jeep nga pasaheroan human kini matumbahi sa Acacia   sulod sa iyang sakyanan didto sa barangay Zapatera, ning dakbayan sa Sugbo kagahapon sa alas 2:30 sa hapon.

Ang drayber nailhan nga si Clenio Bontuyan, 63, nga taga barangay Talamban ning dakbayan nga nagmaneho sa   PUJ   nga nagbiyahian sa ruta sa Talamban sa maong higayon.

Didto na hiilhi si Bontuyan sa Cebu City Medical Center   diin mahilngi ang iyang driver’s license   sulod sa iyang bulsa samtang gibayungan siya ngadto sa mga mihatod kaniya sa maong tambalanan.

Samtang si Mayor Michael Rama mimando dayon sa Department of Social Welfare and Development (DSWD) nga gipangulohan ni Cathy Yso sa paghikay dayon sa pinansyal nga hinabang ngadto sa pamilya sa biktima. Sa samang higayon gibutyag usab ni Rama nga makigtagbo siya sa mga tinugyanan sa Department of Agriculture   ug sa Department of Environment   and Natural Resources   aron mahisgotan nila ang bahin sa pagmonitor sa mga dagkong kahoy nga peligro kaayong matumba ug mokalas og kinabuhi sama sa nahitabo kang Bontuyan.

Nasayran nga usa sa mga pasahero ni Buntoyan nga si Jomar Lastimosa, hingkod, mibutyag sa mga tigbalita nga an g biktima may pasaherong upat ka lalaki    ug duha ka babaye niadtong tungora.

Samtang nagdagan ang jeep sa biktima pag-abot sa Zapatera nabantayan sa iyang mga pasahero ang Acasia sa atubangan sa Zapatera Elementary School nga katumbahon na busa naglumba silang tanan sa pagpanglayat gikan sa jeep.

Apan naabtan si Buntoyan sa iyang lingkoranan   sa natumba nga Acasia ug wala na kini makagawas pang buhi gumikan sa pagkapiit niya sa atop sa iyang jeep nga mitabon kaniya.

Nasayran nga una matumba ang Acasia nga may kaguwangon nang 100 ka tuig nabag-iran niini ang usa ka transformer sa usa ka poste sa kuryente hinungdan sa pag-ulbo niini nga maoy nakapadapit sa mga bombero sa pagsusi sa maong hitabo.

Samtang ang hepe sa BFP nga si Anderson Comar mibana-bana nga adunay gibug-aton nga 20 tonelada ang punoan sa maong kahoy nga dili magakos og tulo ka tawo.

Sa laing bahin si City Agriculturist Joel Baclayon miawhag sa mga opisyal sa barangay nga motabang sa pagpanghiling   sa mga punoan sa mga dagkong kahoy nga anaa sa ilang tagsa-tagsa ka hurisdiksyon sa pagsuta   kun lig-on ug luwas pa ba kini.

Tungod kay matud pa ni Baclayon nga kun ang kahoy molanat na og   100 ka tuig ang kaguwangon may posibilidad nga magkagabok ang ilawom sa punoan niini.

Pipila sa mga lugar nga may mga nagbarog pang mga kaaran ug dagkong punoan   sa Acasia mao ang barangay Lahug, Guadalupe ug maingon man sa Plaza Independencia.   - BANAT NEWS