CEBU, Philippines - Patay ang usa ka sakop sa Crips gang human kini gipusil sa drayber sa traysikad samtang nakig-estorya ang biktima uban sa iyang mga higala sa miaging gabii diha sa sitio Kulo sa barangay Inayawan siyudad sa Sugbu.
Ang biktima giila sa kapulisan nga mao si Cesar Bas Jr., 19, taga Proper Inayawan sa naasoy’ng lugar samtang ginganlan lang og “Tating” nga drayber sa traysikad nga taga barangay Dawis sa dakbayan sa Talisay ang gitumbok nga mamumuno sa biktima.
Sa pasiunang pakisusi nila ni SPO4 Alex Dacua, PO3 Edario Manatad, PO2 Leroy Bagiuo ug PO1 Esmer Escuttar sa Homicide Section nagkuyog ang biktima sa iyang mga higala nag-estorya atubangan sa vediokehan dihang miabot ang suspek ug kalit gipusil ang biktima.
Ang biktima nga naigo sa nagkadaiyang parte sa kalawasan ug daling gihatud sa iyang mga higala ngadto sa Cebu City Medical Center (CCMC) diin gideklarar ang biktima nga dead on arrival (DOA).
Samtang ang suspek daling misibat sa maong lugar bisan paman ang kapulisan milusad dayon og hot pursuit operation apan pakyas sa pagsikop niini. Ang kapolisan nagdudang adunay atraso ang biktima ngadto sa suspek. - BANAT NEWS