Rama mipahunong sa mga quarry

CEBU, Philippines - Pormal na nga gipahunong ni Mayor Michael Rama ang nagkadaiyang kalihokan sa quarry sa upat ka barangay sa siyudad sa Sugbo gumikan sa kakuwang niini sa permit.

Kini gidumala nila ni Remegio Oyao kinsa nangubkob sa yuta nga   gawas na sa lugar nga gitugot sa ilang permit didto sa Pulang Bato.

Samtang ang quarry sa barangay Binaliw nga gidumala ni Raul An Diano gideklarar usab nga illegal gumikan kay ang permit niini nabahas na niadtong Abril 30 ning tuiga. Mao gihapon ang pagpangubkob nga gihimo ni Elena Condeniera sa Pulang Bato wala gihapoy permit busa hingpit na gyud kining gitak-opan.

Ang Cebu City Mining and  Regulatoy Board (CCMRB) mipadala usab og “cease and desist order” ngadto sa kapitan sa barangay Kalunasan nga si Nunilon Monares gumikan sa pag-quarry niini sa bukirang bahin sa iyang barangay nga wala gihapoy permiso.

Nasuta sa CCMBRB nga ang quarry ni Monares adunay Site Development Permit sa Cebu City Planning and Development Office ug nakaangkon usab kini og Environmental Compliance Certificate (ECC) gikan sa Environmental Management Bureau (EMB-7) niadtong Septiyembre 27, 2010 apan pakyas kini sa pag-angkon og permit gikan sa Office of the Mayor.

Nagkanayon si Rama nga gihuna-huna ra niya ang kaluwasan sa katawhan ug ang iyang hangyo sa mga quarry operator nga motuman kini sa balaod. (Sanden J. Anadia/WC) (BANAT)