Dugang polis gidestino sa lalawigan

CEBU, Philippines - Nadugangan na usab ang puwersa ang kapolisan sa probinsya sa Sugbo human i-apod-apod ngadto sa mga lungsod ug syudad ning lalawigan ang   29 ka mga bag-ong mga opisyal sa polis nga anaa pa sa pagbansay.

Si Sr. Supt. Patrocinio Comendador Jr., director sa Cebu Provincial Police Office (CPPO) miingon nga ang   maong mga polis dili pa igo sa gikinahanglang gidaghanon sa mga mobantay sa katawhan sa probinsya apan makatabang na kini sa pag-alagad ug pagserbisyo ngadto sa katawhan.

Ang gidaghanong bantayan sa matag polis mao ang   1,677 ka tawo ug ang CPPO layo pa kaayo sa maong gidaghanon sa katawhang bantayan sa matag polis.

May 204 ang katibuk-ang gidaghanon karon sa mga bag-ong polis nga gihandos sa   Police Regional Office-7 ngadto sa mga buhatan sa City ug Provincial Police Office sa tibuok Central Visayas, diin 29 niini ania sa Sugbo, 62 sa Bohol, 43 sa Negros Oriental, 38 sa dakbayan sa Mandaue, 36 sa dakbayan sa Sugbo, 16 sa dakbayan sa Lapulapu, samtang 10 ang gipa-standby karon sa PRO7.  (Rey B. Pasaporte/WC) (BANAT)