May sakop sa SPEED mangaon di mamayad?

CEBU, Philippines - Miawhag si Mayor Michael Rama sa mga sidewalk vendors nga kinahanglan nga mosumbong gyud sila kung adunay mga sakop sa Squatters Prevention Encroachment Elimination Division ang mangilkil kanila sa kadalanan.

Sumala pa sa mayor nga dili siya magduha-duha sa pagpatangtang sa mga sakop sa SPEED kung mapamatud-an nga wala kini nagtinarong sa ilang trabaho.

Si Rama miawhag niini human siya makadawat og report nga adunay mga sakop sa SPEED nga mangaon sa mga gagmay’ng kan-anan sa sidewalk ug dili na mamayad.

Gituohang dili nalang usab maningil ang naninda tungod sa kabalakang basin haruson og demolis sa SPEED ang ilang mga paninda. Hinuon ipaagi gyud sa hustong proseso ang pagpa-imbistigar sa mga sakop sa SPEED nga masakpang magtinunto sa trabaho ug himoan dayon kini og dinalian nga aksyon.

Si Rama mimando na og imbestigasyon batok sa maong mga sakop sa SPEED ug miawhag sa mga vendors nga mokooperar kung aduna silay susamang mga reklamo. (Sanden J. Anadia/EIM) (BANAT)