2 ka kawani sa brgy positibo sa illegal drugs

CEBU, Philippines - Duha ka mga kawani sa barangay Zapatera ning dakbayan sa Sugbo ang gipaubos sa confirmatory test human kini hisakping positibo sa paggamit og ginadiling drugas sa usa ka kinalit nga pagpahigayon og drug test sa miaging Lunes.

Si Joey Herera kinsa maoy hepe sa Cebu City Office for Substance Abuse and Prevention(COSAP) nagkanayon nga mikabat og 30 ka mga kawani sa maong barangay ang ilang gisuwayan sa pag-ila kun tiggamitan ba kini og ginadiling drugas sa maong higayon apan duha lamang ang nasuta nilang positibo niini. Si Herera mapasalamaton kaayo sa mga kawani nga mikooperar kanila sa maong drug testing.

Si kapitan Albert Reformina sa Zapatera misaysay sa Banat News nga    tangtangon diha-diha niya ang duha ka empleyado kun masuta gayud kining positibo sa paggamit sa ginadiling drugas pinaagi sa confirmatory test kansang resulta ipagawas karong sunod semana.

Nagkanayon ang kapitan nga isip nag-alagad sa katawhan kinahanglan nga walay bisyo sa ginadiling drugas ang iyang mga empleyado ug magsilbi kini nga maayong   sumbanan   sa katawhan.

Gawas sa mga kawani, nagpa-drug test usab ang mga opisyales sa barangay nga gipangulohan ni Reformina.

Samtang ang COSAP mipadayag nga mohimo pa sila og surpresa nga drug testing sa nagkadaiyang barangay ning dakbayan ug masaligon sila nga mohatag og lapad nga suporta ang mga opisyales sa barangay sa himoon nilang operasyon. (Sanden J. Anadia/WC) (BANAT)