200 baboy napaig sa sunog, paig nga baboy gipamalit og barato sa mga tawo

CEBU, Philippines - Moabot sa 200 ka mga baboy ang nahurot sa pagkapaig human naapil sa pagkasunog ang piggery tupad sa nasunog nga pabrika sa rattan (uway) kagahapon sayo sa buntag sa Zone 5 sa barangay Biasong sa dakbayan sa Talisay.

Kagahapon bisan pa sa pagdili sa city veterinarian sa dakbayan sa Talisay gidugokan sa mga tawong namalit sa nangapaig nga baboy ang maong piggery sa mas baratong presyo.

Si SFO1 Caesar Serna sa Talisay City Fire Department sa pakighinabi sa Banat News nagkanayon nga alas 5:45 nagsugod ang sunog ug ilang nakontrolar human sa 15-minutos ug gipaubos sa first alarm.

Matud ni Serna didto nagsugod ang sunog sa rattan factory nga gipanag-iya ni Maximo Lisondra Jr. ug mikatap sa tupad nga piggery nga may 200 ka mga baboy nga igbabaligyaay na unta kagahapong adlawa.

Si Serna nagkanayon nga sa ilang pag-abot dako na kaayo ang kayo hinungdan nga wala na nila matabang og nahurot gyud sa pagkapaig ang 200 ka mga baboy. Apan aduna say uban nga namatay tungod sa kainit.

Hinuon wala makakatap sa kasikbit nga panimay ang maong sunog gawas sa gihimong mini-apartment nga iya gihapon ni Lisondra nga nakan-an sa kalayo.

Matud ni Serna nga human sa sunog dunay gikatahong na-missing nga caretaker ni Lisondra hinungdan nga ilaha kining gipangita apan didto ra diay natulog sa gitrabaho nga mini-apartment.

Gituohang electrical short circuit gikan sa main nga plangka ang sinugdanan sa sunog nga midanyos og P750 mil sa kinatibuk-an. (Rey B. Pasaporte/EIM) (BANAT)