2 tigbalita naaksidente 1 patay

CEBU, Philippines - Patay ang usa ka radio blocktimer sa Radyo Natin ug seryuso ang kahimtang sa kauban niining volunteer reporter sa Bantay Radyo (DyDD) nga konsehal sa barangay human aksidenteng mibangga ang ilang gisakyang motorsiklo sa trak de karga sa sitio Franco sa barangay Curva lungsod sa Medillen alas 7:00 kagahapon sa buntag.

Patay ang nagmanihong si Samuel Sidro, taga Poblacion San Remegio ug seryuso ang kahimtang sa angkas niining si Diolito “Junie” Dela Cruz, nga barangay kagawad sa Lamintak Sur, Medillen.

Sila si Sidro ug Dela Cruz maoy mga nag-anchor sa blocktime program ni Kongresista Benhur Salimbangon sa sibyaanang Radyo Natin sa lungsod sa Medillen nga giulohan og Kalambuan sa Kwarto Distrito samtang si Dela Cruz volunteer reporter usab sa Bantay Radyo.

Samtang ang drayber sa trak de karga nga may kargang mga trabahante mao si Francisco Daitol, 63, molupyo sa Sta. Cruz Curva, Medillen kinsa mitahan dayon sa kapolisan human sa hitabo.

Matud ni PO2 Rosalito Ortega sa Medillen Police dihang nahinabi sa Banat News boluntaryong mitahan sa iyang kaugalingon human sa hitabu ang drayber sa trak de karga nga si Daitol.

Si Daitol dihang na-interbyu sa DyDD nga padulong siya maghatud sa mga trabahante dihang kalit mipaka ang kilid nga bumper sa iyang trak ug sa iyang paglili natumba na ang motorsiklo ug nangalamba ang duha ka sakay niini.

Iyang nakita nga nagbuy-od ang drayber nga gituohan niyang patay ug nakit-an niyang naningkamot pagbangon ang angkas niini.

Matud ni Daitol nahadlok siya nga bun-ogon sa mga kaila ug kabanay sa mga biktima maong dali siyang nanaog ug midagan pahilayo paingon sa buhatan sa kapulisan.

“’Patay gyud siguro ‘tong usa , ang kauban nakita man to nako nihana pagbangon, usa ko nidagan paingon sa munisipyo kay nahadlok ko og bun-ogon unya sa mga tawo didto,” dugang asoy ni Daitol.

Samtang si Dela Cruz daling gihatud sa Verallo District Hospital sa siyudad sa Bogo ug gibutyag sa nurse on duty nga si Anievebe Godinez nga adunay samad sa mata ug ulo ug talandugon ang kahimtang niini.

Si Dela Cruz gibalhin na sa Vicente Sotto Memorial Medical Center sa dakbayan sa Sugbo alang sa dugang medikasyon.

Samtang gibutyag sa asawa ni Dela Cruz nga si Lionita Dela Cruz nga gikan sa ilang balay si Junie paingon unta sa ilang programa sa Radyo Natin dihang naaksidente. (Darrel Carumba/EIM) (BANAT)