CEBU, Philippines - Ang Estados Unidos mihatag og X-ray machine nga balor og P1 milyon sa Custom’s Port of Cebu aron ipakgang sa mga buot ipalusot nga mga kontrabando sa mga smuggler.
Ang CT-30 Contraband Detection Equipment Kit o CDEK pormal nga gidawat ni Port District Collector Ronnie Silvestre sa Sugbo sa miaging adlaw.
Matud ni Silvestre nga dako kaayo og ikatabang kanila ang maong kahimanan kay masayran man niini bisan ang gamay’ng butang nga isulod sa unsa mang kargamento sama sa illegal nga drugas, kemikal nga makamugna og dagkong kadaot ug bisan bomba sa nagkadaiyang matang.
Si Silvestre nagkanayon nga ang Sugbo usa sa gihatagan ning maong X-ray machine gumikan sa kadaghang smuggler dinhi nga kun dili mabantayan siguradong moburot gyud sa dagko kaayo nilang kinitaan nga walay bayad-bayad og buhis ngadto sa gobyerno.
Ang ubang dapit nga gihatagan ning maong kahimanan mao ang BOC Cagayan de Oro, ug BOC Zamboanga.
Midugang si Silvestre nga gumikan sa kagaan dad-on sa maong kahimanan pwede kining magamit sa Customs Sub-Port of Mactan alang sa mga bagahe gikan sa mga pasaherong langyaw.
Nagpasalamat ang taga Customs sa mga kadagkoan sa Amerika kay mihatag ning maong mga kahimanan aron ipuli nianang palyadonng X-Ray machine sa sa BOC Cebu. (BANATNEWS)