CEBU, Philippines - Patay diha-diha ang drayber sa V-hire ug angol ang usa sa mga pasahero niini dihang gi-rapido sa nagmotor nga mga lalaki samtang nagbiyahi duol sa merkado sa sitio Palaca sa barangay Poblacion sa lungsod sa Alcantara kagahapon sa alas 6:00 pasado sa buntag.
Ang biktima mao si Victorino Toreno,53, molupyo sa Poblacion lungsod sa Badian nga nakaangkon og mga samad pinusilan sa ulo, liog ug abaga. Ang mga mamumuno giingong nagsuot og jacket ug helmet nga sakay sa itom nga motorsiklo.
Usa sa 12 ka pasahero nga si Wilbert Templado, 26, nga naglingkod tupad sa drayber sa front seat natapsingan sa bala sa tuong dunggan.
Matud ni SPO1 Raymundo Sala, imbestigador sa Alcantara Police Station dihang nahinabi sa Banat News gikan sa lungsod sa Moalboal paingon sa siyudad sa Sugbo ang V-hire.
Pag-abot sa maong lugar kalit nga gituparan sa mga mamumuno ang V-hire ug gipusil sa backrider ang biktima dayong sibat paingon sa bukirang bahin nga lahos sa lungsod sa Moalboal.
Ang mga polis naka-recover og siyam ka kabhang sa .9mm kalibreng bala sa crime scene nga gituohang gikan sa armas sa mga mamumuno.
Ang kapulisan nagpadayun pa sa ilang man hunt operation sa paghimo ning balita. (BANATNEWS)