Guardo mangayo'g sorry ni Osmeña?

CEBU, Philippines - Gipaabot nga mangayo og pasaylo ang negosyanteng si Jonathan “Atan” Guardo ngadto kang Kongresista Tomas Osmeña karong Biyernes sa Philippines Mediation Center (PMC) sa Palace of Justice Building.

Kini kalabot sa pasangil ni Guardo sa miaging tuig samtang naghinangat ang eleksyon nga matud pa gipugngan sa kagamhanan sa siyudad ang grupo ni Guardo sa pag-apod apod og relief goods ngadto sa mga biktima sa sunog sa barangay Calamba.

Kahinumduman nga gipasakaan og kasong libelo ni Osmeña si Guardo gumikan kay dili tinuod ang maong pasangil sa negosyante. Si Osmeña misaysay nga wala’y problema kaniya ang pagpangayo og pasaylo ni Guardo kinsa iyang nahimong kaatbang sa piniliay niadtong 2010 alang sa pagka-kongresista.

“No problem with me as long as he apologizes to the city government,” sumala pa ni Osmeña. Sumala pa sa kongresista nga responsibilidad niyang depensahan ang siyudad niadtong higayona busa gipasakaan niya og kaso si Guardo.

Hinuon karong Biyernes pa hingpit nga mahibaw-an kung unsa na ang mahimong estado sa kaso ilabi na nga nangayo na og pasaylo si Guardo ngadto sa reklamante. (BANATNEWS)