Korte Suprema giawhag anti-drug enforcer protehian

CEBU, Philippines - Gi-awhag karon ang Korte Suprema nga moluwat og circular nga magproteher sa mga anti-drug enforcer gikan sa kapiligro sa hulga sa ilang kinabuhi samtang  nag-atubang sa ilang krusada.

Kining maong awhag giduso ni kanhi Dangerous Drugs Board (DDB) Undersecretary Paul Clarence Oaminal ngadto sa labaw’ng hukmanan aron kapanalipdan ang mga anti drug enforcer ug crusader kinsa seryuso sa ilang krusada batuk sa gidiling drugas gikan sa pagpanghasol nga mugnaon sa mga druglord ug   sa mga tigpayuhot   niining illegal drugs.

Gibasihan ni Oaminal   sa iyang awhag ang Amerika ug Canada nga nag-umol gyud og   balaod   nga manalipod sa kinabuhi sa mga civilian kinsa aktibo kaayo sa pagduyog sa kampanya batok   sa gidiling drugas sama sa gitawag og Strategic Lawsuit Against Public Participation (SLAPP).

Gipasabot ni Oaminal nga sa pagkakaron ang mga posibling kaso nga magamit batok sa mga anti drug enforcer naglangkob sa planting of evidence ubos sa Sec. 29 sa Akta Republika 9165, arbitrary detention ug ang searching domicile without witnesses ubos sa Revised Penal code.

Gipasabot ni Oaminal nga daghan nang mga hitabo nga ang mga otoridad mabiktima   inig pasaka nila ning maong matang sa kaso.

Kini tungod kay   ang mga drug lord may mga sumbanan na sila bahin sa mga estratihiya nga ilang sagupon batok sa mga otoridad   aron konuhay sa pagpaluya sa kampanya sa gobyerno batok sa gidiling drugas samtang maghatag hinuon kanila og higayon pagpakusog sa ilang illegal nga transaksiyon.

Tungod niini gi-awhag ni Oaminal ang Korte Suprema nga panahon na karon nga mohimo sila og tukmang lakang aron kapanalipdan ang mga nagtinarong nga anti drug enforcer sa ilang katungdanan ug magdasig kanila aron magpadayon sa ilang krusada batok sa gidiling drugas.   - (BANAT NEWS)