CEBU, Philippines - Ang kontrobersiyal nga hepe sa Carmen Police Station sa amihanang lungsod sa lalawigan sa Sugbo miakusar sa mga sakop sa rebelding New Peoples Army (NPA) nga maoy tag-iya sa mga plantasyon sa marijuana sa bukirang bahin sa maong lungsod. Si Insp. Edgar Awit, hepe sa kapolisan sa Carmen mibutyag sa Banat News nga ang maong kasayoran gikan ra usab sa mga mag-uuma sa maong lungsod kinsa maoy nagmonitor sa mga kalihokan sa NPA sa ilang lugar.
Miingon si Insp. Awit nga dili gyud mawad-an og marijuana ang kabukiran sa Carmen tungod kay kun ila kining malarot abtik kaayo ang mga NPA nga mohulip og tanom sa mga nalarotan.
Hinuon nagtuo si Awit nga kun mabantayan lang pag-ayo sa kapolisan ang maong mga plantasyon ug malarot dayon ang mga marijuana niini, malagmit kapoyan madugay ang maong mga mag-uuma hangtod nga moundang kini.
Matud ni Insp. Awit nga gikan sa Enero ning tuiga hangtud karon mokabat na sa kapin sa 10 mil ka mga hamtong punoan sa marijuana ang ilang naibot gikan sa mga hilit nga plantasyon sa marijuana sa bukid. Midugang siya nga subsob usab karon ang ilang pagpakig-alayon sa Philippine Drugs Enforcement Agency (PDEA) ug sa mga sakop sa Philippine Army nga nagbase sa midnorth area pagpanglarot sa gidiling mga tanom.
Mibahad si Insp. Awit nga tinud-on gyud nila ang paggukod sa tigpananom og marijuana sa bukirang bahin sa lungsod sa Carmen. Dugang niya nga sa pagkakaron aduna na sila’y duha ka suspetsado nga nananom og marijuana nga napasakaan na og kaso ug nagtingkagol na karon sa bilanggoan.
Nasayran nga si Insp. Awit gireklamo sa kauban niyang polis nga si PO3 Roger Dilan tungod sa pag-ariglo niini sa kaso sa ilang dinakpan nga naghupot og armas de fuego nga walay lisensya. - (BANAT NEWS)