15 bata naluwas gikan mga traffickers

CEBU, Philippines - Kinse ka mga minor de edad ang naluwas sa Maritime Police gikan sa mga gidudahang human traffickers nga taga Luzon sa miaging gabii sa Pier 3 ning dakbayan.

Ang mga menor de edad nga pulos mga babaye nagpangidaron gikan sa 14-anyos ngadto na sa 17-anyos nga mga taga Getape, Bohol .

Samtang ang gidudahang illegal recruiters nagpangidaron usab og 41-anyos uban sa iyang anak nga 22-anyos nga anak nga babaye kansang mga pangalan gipugngan una sa Banat News hangtud nga wala pa mapasaka ang kaso batok kanila.

Matud pa ni Senior Inspector Joselito Oñez sa Cebu Maritime Police usa ka gwardiya sa Pier 3 ang nakakita sa duha ka hamtong nga babaye nga nagpanon uban sa kinse ka mga batan-on nga nanganaog sa usa ka fastcraft gikan sa Tagbilaran, Bohol pasado alas-6 sa gabii.

Ang gwardiya gikatahong gibati og katahap sa linihukan sa duha ka hamtong nga kauban sa grupo sa mga bata hinungdan nga kini mitawag sa Maritime Police.

Tungod niini, ang Maritime Police daling misusi sa maong lugar ug giduol ang maong mga hamtong ug diha nila madiskubrehing kadudahan ang mga pamahayag sa duha.

Sa ilang gipahigayon nga inisyal nga imbestigasyon ang duha ka gidudahang illegal recruiters nga pulos taga Tandang Sora sa Quezon City nangangkong ilang mga paryente ang maong mga bata sa Gitape, Bohol .

Base sa nakuha sa ilang mga kamot nga ticket nasayran nga ang duruha migasto og di mominos P20 mil isip pamilite sa mga bata gikan sa Bohol nganhi sa Sugbu.

Nasuta usab nga gikatakdang manakay ang grupo og barkong padulong sa Manila nianang alas-8 nianang gabhiuna ug nagpaabot og masakyan padulong unta sa Pier 6 apan naabtan sa mga polis.

Atol sa pagsukit-sukit ang duha nangangkon nga buot lang nilang tultolan ang maong mga batan-on padulong sa Manila aron makatrabaho.

“Pagtulong lang ginawa namin at ito na ang ginawa nila sa amin,” matod pa sa usa sa mga gikatahong recruiters ngadto sa mga polis. Ang kinse ka menor de edad nga babaye gi-turnover na sa buhatan sa Department of Social Welfare and Development aron matabangang makauli sa ilang mga lugar.

Ang duha nagtingkagol sa Waterfront Police Station ug pasakaan og kasong Republic Act 9208 o Anti-Trafficking in Persons Act 2003.   - (BANAT NEWS)