CEBU, Philippines - Upat ka mga pasahero ang naangol apil na ang usa ka Taiwanese dihang nadasmagan og 10- wheeler trucks ang jeep pasaheroan nga ilang gisakyan sa barangay Bunakan lungsod sa Madridejos sa isla sa Bantayan niadtong Huwebes sa alas 3:00 sa hapon.
Sa upat ka mga pasahero duha niini ang talandugon ang kahimtang nga mao sila si William Bilbao, 36, taga sitio Gahong barangay Cudia ug ang Taiwanese nga si Mah Kui Sang, 5, molupyo sa Mansilang, Madridejos.
Samtang ang laing duha nga nakaangkon lang og minor injuries mao sila si Joseph Bayag,17, taga barangay Cabac, Bantayan ug Ricardo Batuhan,17, taga Pooc lungsod sa Sta. Fe.
Samtang ang drayber sa nakadasmag nga trak mao si Eliseo Santillan, 33, taga barangay Tugas, Madridejos kasamtangang gitanggong sa kapolisan.
Matud ni PO2 Rico Reboquio sa Madridejos Police dihang nahinabi sa Banat News pulos gikan sa Bantayan ang maong mga sakyanan paingon sa Madridejos ug nag-una ang jeep pasaheroan nga dunay sakay nga 20 ka pasahero.
Pag-abot sa maong lugar mihunong ang jeep aron pag-pickup og pasahero hinungdan nga niminor ang nagsunod nga trak apan dihang miabante na ang pasaheroan mi- overtake ang trak hinungdan nga nabanggaan ang luyong bahin sa jeep.
Hinungdan sa pagkapakong sa mga pasahero diha sa sulod ug gipangdala sa Bantayan District Hospital ug ang duha nga nagrabihan gibalhin og tambalanan sa dakbayan sa Sugbo. - (BANAT NEWS)