Sundalo milugos sa katabang

CEBU, Philippines - Gireklamo og 3-counts of rape ang usa ka sakop sa Philippine Army nga nagpuyo sa barangay Danlag sa lungsod sa Consolacion sa 14-anyos niyang katabang nga lumad nga taga Pinamungahan.

Si PO2 Johnaski Romero sa kapolisan sa maong lungsod miingon nga ang gireklamo nga sundalo nga nagpanuigon og 37-anyos (pangalan gipugngan samtang wala pa mapasaka ang kaso) minyo ug nadestimo sa Central Command sa dakbayan sa Sugbo.

Matud pa niya nga base sa giasoy sa dalagita nga unang nahitabo ang pagpanglugos kaniya sa gabii niadtong bulan sa Abril niining tuiga dihang nahiuli sa ilang panimalay ang suspetsado nga hubog.

Ang biktima mibutyag nga gitionan siya niini og kutsilyo niadtong tungura ug sa kahadlok wala na siya mosukol hangtud nga milampos ang suspek sa paglugos kaniya.

Giusban siya paglugos sa suspek niadtong bulan sa Mayo niining tuiga sa susama gihapon nga kahimtang ug nasubli na usab kini sa ikatulong higayon sa bulan sa Hunyo niining tuiga.

Dugang pa nga asoy sa biktima nga tungod niini mipauli siya sa ilang pinuy-anan sa lungsod sa Pinamungahan ug gisugilon ang iyang kasinatian ngadto sa iyang mga ginikanan.

Si Romero miingon nga nag-andam na ang ilang Womens Desk Section sa ipasakang kaso batok sa maong sundalo karong adlaw’ng Lunes. (EIM)   - (BANAT NEWS)