Usa patay, sa sunog sa barangay Guadalupe

CEBU, Philippines - Usa ka tawo ang namatay ug usa ka 16-anyos nga babaye ang naangol human mapaso ang kalawasan sa dihang miulbo ang sunog kagahapon sa udto diha sa residensya nga lugar sa sitio Sta. Lucia, Andres Abellana sa barangay Guadalupe siyudad sa Sugbu.

Moabot og 15 ka balay ang naugdaw ug duha ang partially burned nga miresulta sa danyos nga P350 mil matud pang Cebu City fire marshall Sr. Supt. Aderson Comar.

Giisa dayon ni Comar ngadto sa general alarm tungod sa sitwasyon sa maong lugar nga nagsikit-sikit ang mga balay gikan sa balay ni Danilo Cupio nga diin magsugod ang kalayo.

Ang ig-agaw ni Cupio nga si Jovannie giingong giatake sa sakit sa kasing-kasing human ma-suffocate sa aso ug napantok ang ulo ug patay na pag-abot sa Cebu City Medical Center (CCMC) matud pa ni SFO1 Virgilio Niñal.

Si Liezel Contanilla, nakaangkon og 2nd degree burn sa iyang lawas sa dihang paingon na siyang moeskapo sulod sa ilang balay nga duol ra kaayo sa balay ni Cupio.

Si Kapitan Michael Gacasan miingon nga ang pamilyang naapektuhan sa sunog ipahiluna diha sa bakanteng luna sa PJV homes subdivision duol sa nasunogan.

Kasagaran sab sa mga apektadong mga residente nag-abang og luna ug padayon pa karon ang ilang pagsusi kun pila ka tawo gyud ang apektado samtang ang mga social workers sa Cebu City Hall mipadala na og pasiunang hinabang.

Ang alarma ilang nadawat alas 12:42 ug iyang gideklarar nga under control sulod sa 8 minutos. Giingong nagsugod ang kalayo sa ikaduhang andana sa balay ni Cupio apan dili pa nila matumbok kun unsay sinugdanan niini.   - (BANAT NEWS)