CEBU, Philippines - Usa ka 5-anyos nga batang babaye ang namatay sulod sa tambalanan human gikatahong gikulata og maayo sa 18-anyos nga anak sa amahan sa bata sa laing inahan diha sa barangay Alang-Alang, dakbayan sa Mandaue.
Si PO1 Diana Magbanua sa Women’s Desk Section sa kapolisan sa Presinto 1 sa Centro Police Station sa Mandaue City Police Office (MCPO) sa pakighinabi sa Banat News miingon nga ang namatay mao si Kate Ariane, 5.
Sumala pa niini nga gidala sa ilang buhatan sa apohang babaye ang bata niadtong Hunyo 15 niining tuiga tungod sa pagdagmal sa suspek sa bata.
Dugang pa niya nga base sa iyang pagtan-aw sa kalawasan daghan kini og mga bun-og ug garas sa kalawasan nga gialegar sa apohan nga binuhatan sa 18-anyos nga igsuon sa bata sa amahan kinsa giila sa bata nga iyahang ‘ina-ina.’
Matud pang Magbanua nga sa iyang pagsusi sa bata iyahang namatikdan nga daw nagkadeperensya na kini sa pangisip tungod kay bisan paman sa nahiagumang mga dili na normal nga mga bun-og sa kalawasan nagkatawa-tawa ra kini.
Hinungdan nga iyahang gitambagan ang apohan nga ipahiling kini dayon sa Vicente Sotto Memorial Medical Center sa dakbayan sa Sugbo.
Apan si Magbanua miingon nga milungtad lang og pipila ka mga adlaw nga pagpatambal sa biktima sa nahisgutang tambalanan namatay kini gihapon niadtong Hulyo 27.
Matud pa ni Magbanua nga daghan sa mga silingan sa maong dapit ang nakasaksi sa gihimo sa suspetsado ngadto sa biktima sama sa pagbunal niini og gahing butang ug pagkandado sa bata sa panimalay uban sa 9-anyos nga batang lalaki nga igsuon sa namatay.
Gikatakdang pasakaan og kasong child abuse resulting to homicide ang suspetsado kinsa giingong milayas na ug adto na magpuyo sa usa ka lungsod sa habagatang bahin sa lalawigan sa Sugbo. (EIM) - (BANAT NEWS)