Nasakpang nag-motel imbestigahon

CEBU, Philippines - Gipahibalo ni Mayor Michael Rama nga iya nang gipaubos sa pormal nga imbetigasyon ang giingong duha ka kawani sa City Hall nga mi-check in sa usa ka pension house sa dalan Manalili sa milabay nga gabii.

Nagkanayon si Rama nga iagi gyud niya og saktong proseso ang pag-imbestigar sa maong mga kawani busa iya lang una gipadapalin ang nadawat niya nga sugyot nga angayan nga suspensuhon ang maong mga kawani.

Matud pa sa mayor ang duha dunay katungod nga manalipod sa ilang kaugalingon ilabi na nga dili usab kini oras sa tingtrabaho.

Kahinumduman nga gibugno sa usa ka ginang ang babaye sa iyang bana lakip na ang naulahi sa pension house human ang duha manganaog.           

Nasayran nga nakagawas na sa Waterfront Police Station ang nahisgutang mga empleyado sa City Hall human wala modayon og kiha ang asawa sa lalaki.

Sumala pa ni PO2 Janice Tamayo sa Women and Children Protection Desk nga gipasaylo sa babaye ang bana niini alang sa kaayohan sa ilang mga anak.

Hinuon nagpinirmahay ang duha ka kampo nga dili na mousab sa ilang gibuhat. Gidid-an na sa babaye nga mokuyog ang iyang bana sa maong babaye kundili iyahang ihinayon ang kiha.

Nasayran nga nagplanong mokiha ang 30-anyos nga babayeng gipusposan sa ginang kinsa miinsister nga igo ra silang misulod sa maong pension house aron magtabi.  - BANAT NEWS