Mikawat sa bag sa namatay sa aksidente nadakpan

CEBU, Philippines - Nadakpan sa kapolisan ang lalaking gipasanginlang nakaako pagkawat sa bag sa usa ka babayeng namatay sa aksidente sa barangay Paknaan, dakbayan sa Mandaue niadtong Domingo.

Ang maong bag giingong may sulod nga kapin sa P50,000 apan dihang giuli sa suspek nga si Renato Llernes sa tanod sa Paknaan wala na kini sulod.

Ang Investigation Detection and Management Bureau (IDMB) sa Mandaue City Police Office (MCPO) midakop kang Llernes sa barangay Bancal, dakbayan sa Lapulapu kagahapon sa buntag.

Kini human si Llernes maoy gitumbok sa mga tawo nga mikuha sa bag sa namatay nga si Victoria Canoy dihang naaksidente ang giluwanan nga sakyanan uban sa iyang sakop sa pamilya.

Matud pa ni SPO2 Marcos Noval nga dihang nahitabo ang maong aksidente ang kabanay ni Canoy miinsister nga adunay sulod nga P50 mil ang bag niini nga bag-ohay pang gipadala sa anak nga nagtrabaho sa gawas sa nasud.

Si Llernes wala mohimakak nga iyang gikuha ang bag apan miinsister nga P700 ra ang sulod niini. Kasong theft ang ipasaka batok kaniya sa IDMB.  - BANAT NEWS