Mosyon ni Esdrelon ug Berger gibasura

CEBU, Philippines - Gibasura sa Provincial Prosecutors Office ang Motion for Issuance of an Amended Resolution nga gisang-at sa kampo ni Karen Esdrelon ug sa hinigugma niining si Sven Erik Berger ang unang gipasanginlang maoy midagit ug mipatay sa 6-anyos nga si Ellah Joy Pique.

Base sa duha ka pahinang desisyon sa piskalya ilang gibasura ang gihangyo sa kampo ni Esdrelon nga ibasura ang kaso nga gisang-at batok kanila nga Kidnapping with Homicide tungod kay sila inosente.

Gipasabot sa piskalya nga dili sama sa korte, igo lang silang mo-inquest kay dili kini usa ka hearing nga mosuta kun guilty o dili ang gikiha, hinungdan nga ilang gibasura ang hangyo ni Esdrelon ug Berger.

Si Esdrelon ug Berger maoy unang gitumbok nga suspetsado kang Pique ug natanggong sulod sa pila ka adlaw sa Cebu Provincial Police Office apan gipabuhian tungod sa kahuyang sa ebidensya batok kanila.

Sa miaging semana gikiha og multi-milyones nga damage suit ngadto sa United Nations si Edrelon ug Berger batok sa Pilipinas tungod sa gikatahong pagkaguba sa ilang pangalan.  - BANAT NEWS