CEBU, Philippines - Upat ang angol apil na ang drayber dihang natagak sa pangpang ang usa ka 10- wheeler truck nga puno sa karga nga semento sa barangay Sta. Ana sa lungsod sa Barili niadtong Miyerkules sa alas 4:45 sa hapon.
Ang Isuzu 10-wheeler truck dunay plaka nga GVX-515 nga gipanag-iya ni Joel Orbeso taga barangay Jaclopan siyudad sa Talisay ug gimaneho ni Fernando Roble, 37, kinsa usa sa mga naangol.
Samtang ang tulo ka helper niini nga nangaangol usab mao sila si Ambrosio Pangandoyon, Ruby Calvo, 25, taga Guinsay, Danao ug Renante Cesbesi ,28, taga Banhigan lungsod sa Badian.
Matud ni PO2 Ildefonso Cuts sa Barili Police Station dihang nahinabi sa Banat News adunay kargang 600 ka sakong semento gikan sa lungsod sa San Fernando paingon sa lungsod sa Dumanjug ang trak.
Pag-abot sa maong lugar giingong mikagar ang brake niini hinungdan nga napugos og bangga ni Orbeso sa kahoy ang trak aron mabangil apan wala makapugong ang maong kahoy ug natagak gyud kini sa pangpang nga gibanabanang 10-metros ang gilawmon.
Daling gitabang sa mga molupyo sa maong lugar ang mga biktima ug gihatud sa Barili District Hospital ug luwas na sa peligro. - BANAT NEWS