CEBU, Philippines - Patay ang usa ka masyador sa buwangan human kini gi-ambusan pipila ka gutlo human gipasanginlang namago gikan sa tigbakayan sa barangay San Vicente sa lungsod sa Liloan niadtong Miyerkules sa alas 4:40 sa hapon.
Ang biktima nga namatay samtang gi-atiman sa mga doktor mao si Roger Pacumio, 38, lumad nga taga Masbate apan anaa na magpuyo sa Yati, Liloan ug masyador sa buwangan ang pangita.
Samtang ang mamumuno gihulagway lang sa mga nakasaksi nga duha ka lalaking nagsakay og motorsiklo nga kolor itom nga Yamaha Meo nga pulos nagsul-ob og helmet ug ang angkas niini maoy nipusil.
Matud ni SPO2 Ernesto Pepito Jr., sa Liloan Police Station dihang nahinabi sa Banat News subay sa imbestigasyon ang biktima gikan sa tigbakayan sa barangay San Vicente ug naglakaw sa pag-uli niini sa dalan kalit nga gisugat sa mga mamumuno.
Pag-abot sa tungod ang angkas midiretso kini sa pagpusil sa ulo ug pagkahuman misirit pahilayo sa ilang gisakyang motorsiklo.
Ang biktima nga naigo sa walang bahin sa aping daling gitabang ug gihatud lahos sa Vicente Sotto Memorial Medical Center (VSMMC) apan namatay gyud kini paglabay sa pipila ka gutlo samtang gitabang sa mga doktor.
Ang mirespondeng mga polis naka-recover og usa ka kabhang sa bala sa kalibre .45 nga pistola nga gituohang gikan sa armas sa mga mamumuno.
Dugang nahipos nga impormasiyon sa kapulisan ang biktima giingong nakadispalko og kwarta sa buwangan sayo nianang adlawa ug nakasugat og lalis.Nagtuo karon ang kapolisan nga mao kini ang hinungdan sa pagpusil kaniya. Apan wala usab nila isalikway ang posibleng laing anggulo. Ang kapulisan padayun pa sa ilang hot pursuit operation pag-ila ug pagsikop sa mga mamumuno. - BANAT NEWS