16 anyos gilugos sa nanguyab niya

CEBU, Philippines - Usa ka 16 anyos nga dalagita mireklamo nga gilugos siya sa usa ka 19 anyos nga ulitawo sa usa ka kalibonang bahin sa barangay Polpugan, lungsod sa Consolacion niadtong Martes sa alas 8:00 sa gabii.

Si PO2 Jonaskie Romero, desk officer sa Consolacion Police Station mibutyag sa Banat News nga ang biktima nagtungha isip 2nd year high school, samtang ang gihinganlan niyang suspek mao si Willy Luzano Andaya, ulitawo, nga taga barangay Poblacion Occidental Consolacion.

Matud ni PO2 Romero nga segun sa gitug-an sa biktima kanila nga sa sayo pa ang nangulitawo kaniyang suspek mi-imbitar kaniya pinaagi sa text   nga paadtuon sa ilang (suspek) balay.

Ang biktima nga wala makamatikod sa dautang laraw sa suspek, matud pa, misanong sa maong imbitasyon apan pag-abot niya sa balay sa suspek gidala siya niini ngadto sa usa ka tindahan kay mipalit kini og bino o ilimnong makahubog unya gitagayan siya aron paimnon.

Midugang ang biktima sa iyang pamahayag nga iyang gibalibaran ang maong tanyag apan giingong gipugos gyud siya sa pagpainom, hangtod nga nalipong ug nahubog siya ug silang duha sa suspek pulos na sila hubog ug nag-inagbayay sila balik sa balay sa suspek.

Apan matud pa sa kapolisan wala pasak-a ngadto sa balay ang biktima kay giguyod kini sa suspek ngadto sa kalibonan ug didto giingong gihuboan siya sa iyang senina ug gipahimuslan.

Matud pa sa kapolisan nga giangkon sa biktima nga gumikan sa iyang kahubog wala siya kapiog sa   suspek ug napahimuslan gyud ang iyang pagka-babaye niini.

Human siya pahimusli gipapauli   siya ug didto   gisumbong niya sa iyang ginikanan ang nahitabo kaniya busa ilang gipadangat sa kapolisan ang ilang reklamo.

Kagahapon sa alas 5:00 sa buntag nasikop sa mga polis ang suspek didto sa balay niini.

Ang suspek nagtingkagol na karun sa karsel sa kapolisan samtang gihikay na ang kasong rape batok   sa suspek.   - BANAT NEWS