Barko sa Trans-Asia nasunog

CEBU, Philippines - Usa sa mga barko sa Trans -Asia Shipping Lines nasunog kagahapon sa buntag samtang nagpahigayon og inspection ang mga opisyal sa Maritime Industry Authority (MARINA) sa maong barko.

Mahinumdoman nga siyam ka mga barko sa maong shipping company gisuspenso sa ilang operasyon gumikan sa pagkalunod sa M/V Asia Malaysia nga usa sa mga barko niini dihang nakasugat og kusog nga hangin ug dagkung bawod didto sa kalawran sa Calabasas, lungsod sa Ajuy, 87 kilometros ang gilay-on gikan sa Iloilo niadtong Hulyo 31, 2011.

Kagahapon sa buntag ang mga opisyal sa MARINA misaka sa M/V Trans-Asia 5 aron   sa pag- inspection sa maong barko dihang kalit lang misilaob ang kayo sulod sa cargo area sa M/V Trans-Asia 2 nga nagpundo sa Pier 5. Si Rolando Punzalan, hepe sa Philippine Coast Guard mibutyag sa mga tigbalita nga ang kayo misilaob sa mga alas 10:00 sa buntag ug nakontrolar kini human sa 15 minutos ang milabay.

Matud ni Punzalan nga base sa ilang pasiunang imbestigasyon posibleng adunay nagdagkot og sigarilyo sulod sa barko ug ang upos niini nga wala mapawong gilabay ngadto sa mga kargamento sa barko nga maoy hinungdan sa sunog apan ila pa kining pihuon.

Si Flordelito Ortiz, chief security and safety sa Trans Asia Shipping Lines nagkanayon nga miluwat na sila og kamandoan alang sa pagpahigayon og lawom nga imbestigasyon aron mapiho ang hinungdan sa maong sunog sa cargo area sa barko diin lakip ang starboard niini nakan-an usab sa kayo.

“This is just a minor incident. Amo nang gi-trace kung kinsa ang responsabli niini’, ni Ortiz pa.

Matud usab niya nga ang pagpanigarilyo sa bisan asang bahin sa barko higpit nga gidili ug kalapasan kini sa safety rules and regulations nga gipatuman sa kompaniya.

“We immediately filed a formal complaint against our service provider, the arrastre company, for the damage and such is a negligent act their personnel has committed”, kini base sa press statement nga giluwatan sa kompaniya.

Ang maong sunog nakagusbat usab sa rubber sole, roll carpet ug uban pang mga material sulod sa barko.   - BANAT NEWS