Philhealth cards giapod sa dakbayan

CEBU, Philippines - Moabot ngadto sa 800 kapin ka mga beneficiaries ang nakadawat kagahapon sa Philhealth ID cards sa duha ka mga barangay sa siyudad sa Sugbo.

Si Mayor Michael Rama ug ubang mga staff sa City Hall maoy personal nga mitunol ngadto sa mga beneficiaries sa barangay Tejero ug T. Padilla.

Karong adlawa, laing 1,800 usab ka mga residente sa barangay Labangon ug Tisa ang makadawat og Philhealth cards.

Ang pagpanghatag niini magpadayon hangtud sa Agosto 9 nga ipang-apod apod sa barangay Pahina Central, Ermita, Sinsin, Sudlon I, Sudlon II, Sapangdako, Guadalupe, Hipodromo ug Carreta.

Ang mga beneficiaries nag-agi og hugot nga proseso sulod sa pipila ka buwan aron pagsigurong naggikan sila sa kabos nga pamilya.

Una nang gipadayag ni Rama nga gitagaan niya og pagtagad karon ang mga programa sa panglawas.

Gani nagpadayon usab gihapon karon ang City Hospitalization Assistance & Medicine Program (CHAMP) kung diin liboan na ka mga tawo ang nakapahimulos niini.  - BANAT NEWS