5 kawani sa Lapu' CH positibo sa drugs

CEBU, Philippines - Lima na ka kawani sa city hall sa dakbayan sa Lapulapu ang nasutang positibo sa paggamit sa ilegal nga drugas atol sa nagpadayong random drug test nga gihimo sa kagamhanang lokal sa dakbayan sa Lapulapu.

Kini ang gikumpirmar ni Lapulapu City Mayor Paz Radaza sa pakighinabi sa Banat News ug midugang nga iyaha silang irekomendar nga tangtangon sa ilang trabaho.

Base sa resulta gikan sa City Health sa dakbayan sa Lapulapu nasuta nga tulo ka sakop sa City Traffic Management System (CTMS) ug duha niini sa Clean and Green Program ang positibo sa paggamit og illegal nga drugas.

Bisan paman niini dili pa buot mohunong si Radaza sa pagpanglimpyo sa iyang tugkaran tungod kay buot niyang hasta ang mga kawani sa kabarangayan mapailawom usab sa random drug testing.

Matud pa ni Radaza human nga mapalit sa siyudad ang mga drug testing kits alang sa mga kawani sa city hall buot niyang palapdan ngadto sa kabarangayan ang maong        programa.

Mibahad ang mayor nga di siya maanugonan sa mga empleyadong masakpang tiggamitan og ilegal nga drugas gumikan kay isip kawani sa gobiyerno magsilbi gyud unta silang modelo sa katawhan ilabi na batok sa ilegal nga drugas.  - BANAT NEWS