Electric fan nakaingon sa sunog

CEBU, Philippines - Mokabat sa P450,000 ang gibilin nga danyos sa nahitabong lima ka minutos nga sunog sa dalan Besabella, barangay Tugbongan, lungsod sa Consolacion alas 12:05 nga gialarma sa kabomberohan.

Si SFO2 Renato Lakang, imbestigador sa kabomberohan sa maong lungsod miingon nga ang panimalay nga nasunog ginama nga konkreto nga gipanag-iya ni Leonora Arias Estrera ug naangin usab ang sikbit nga panimalay nga gipanag-iya ni Fe Alinsog Perez.

Matud pa ni Lakang nga ang bag-ong awto ni Estrera lakip usab sa nakasinati og gamay nga kadaut sanglit naapil unta kini sa pagkasunog apan nadali sa pagduot sa mga silingan sa pagpalayo.

Dugang pa niya nga sa pakisusi nga iyang gihimo iyang nasuta nga nagsugod ang kalayo sa kwarto sa panimalay sa biktima nga giokupar sa anak.

Matud pa ni Lakang electric fan nga wala mapawong ang gidudahang nakaingon sa maong sunog dihang kalit lamang nga mi-spark nga maoy hinungdan sa pag-ulbo sa kalayo.

Si Lakang miingon nga walay tawo nga naangol o kinabuhing nakalas sa maong sunog nga ilang gipaubos sa second alarm.  - BANAT NEWS