Tulisang mipusil sa sikyu nailhan

CEBU, Philippines - Giklaro sa hepe sa Cebu City Police Office (CCPO) nga si Sr. Supt. Melvin Ramon Buenafe nga nakaresponde gyud ang mga pulis sa Fuente Police Station sa pagtulis sa nurse nga diin usa ka gwardiya ang napusilan.

Duha ka tulisan ang misuway unta og tulis sa usa ka nurse sa Vicente Sotto Memorial Medical Center (VSMMC) niadtong Domingo sa gabii diha sa dalan B. Rodriguez siyudad sa Sugbu.

Apan nakamatikod ang gwardiya sa tupad nga pribadong tambalanan ug gisitar ang duha ka tulisan maong wala nila makuha ang bag ni Claire Diotay.

Ang duha ka tulisan pagkabulabog , nanagan paingon ngadto sa main entrance sa VSMMC diin magbantay ang gwardiyang si George Tangayan, 19, kinsa niadtong tungura nagbarog.

Sa pagtuong moresponde si Tangayan giunhan kini sa pagpusil sa tulisan ug naigo sa walang kilid sa iyang tiyan ug daling nangikyas ug wala gyud madakpi.

 Ang insidente nahitabo pipila lang ka metros gikan sa Fuente Osmeña Police Station. Matud ni Buenafe human makahibawo ang mga pulis sa Fuente Police Station dali kining mihimo og hot pursuit operation diha sa barangay Sambag 2 apan giangkon niyang pakyas sila pagsikop sa duha ka tulisan.

Hinuon nagkanayon si Buenafe nga nailhan na ang duha ka tulisan. Samtang sa pikas bahin ang guwardya sa usa ka dakong tindahan nga gipusil patay sa duha ka lalaki niadtong Domingo sa hapon nasuta nga wala diay armas nga giisyu sa iyang security agency matud pa ni Buenafe.

Si William Baldado, 26, lumad nga taga Negros Oriental apan kasamtangan nagpuyo sa Basak San Nicolas ning siyudad gipusil ug namatay sa duha ka suspetsadong nadakpan nga sila si Ericson Mainit ug Juanito Lausa nga pulos sa sitio Bato sa barangay Ermita.

Si Baldado gipusil ni Mainit human wala matarong og tubag sa dihang nangutana si Mainit kun asa dapita ang Citi Plaza .

Siya miklaro ang kapulisan igo rang mosuporta sa mga gwardya kun nagkinahanglan kini og police assistance kun asa sila nga establisamento nagbantay.

Makig-alayon hinuon si Buenafe ngadto sa Firearms Explossives Security Agency Guards and Supervisory Section (FESAGSS) nganong wala isyuhi og armas sa GDS security agency ang biktima. Apan awhag ni Buenafe ngadto sa mga gwardya nga kinahanglan kanunay alerto sanglit ang mga tawo anha mo-transact og business sa ilang gibantayan nga establisamento aron dili na masubli pa ang maong hitabo kang Baldado.  - BANAT NEWS