Mga barko sa Trans Asia di pa kabiyahe

CEBU, Philippines - Gisuspenso na ang tanang biyahe sa nahabiling walo pa ka mga barko nga gipanag-iya sa Trans Asia Shipping Lines sugod kagahapong adlawa duha ka adlaw human sa pagkalunod sa laing barko niini ang M/V Asia Malaysia nga nakasugat og dakong bawod sa kadagatan sa Calabasa sa Iloilo niadtong Domingo sa buntag.

Subay sa giluwatang kamanduan ni Maritime Authority administrator Emerson M. Lorenzo sa petsa 1 ning bulana gipahibawo niini nga wala nay bisan usa nahabiling walo ka barko sa Trans Asia ang gitugotang makabiyahe.

Kini hangtud nga mapaubos og balik sa re-inspections pagtino sa sea worthiness sa maong mga barko aron dili na masubli ang susamang panghitabo.

Ang Marina-7 pinangulohan ni director Nannette Villamor-Dinapol ang gitahasan nga modumala sa re-inspection inabagan sa Philippine Coast Guard.

Sa report sa DyDD kagahapon, ang Trans Asia gihatagan og 72-oras human madawat ang kamanduan sa paghatag og katin-awan kun nganong dili angay suspensuhon ang Certificate of Public Convenience (CPC) sa Trans Asia.

Gibutyag ni Atty. Jose “JoJo” Cabatingan, legal officer sa MARINA-7 sa pakighinabi Banat News nga ang re-inspection himuon sa maong mga barko nga ania sa pantalan sa Sugbo.

Samtang ang ubang mga barko niini nga atua pa sa laing lugar ang gitugotang makabalik dinhi sa Sugbo alang sa subling pag-inspeksyon.

Sa nahabiling walo ka mga barko sa Trans Asia 7 niini mga passenger vessel ug usa ang cargo vessel nga pagkakarun gigaid na sa mga pantalan sa Sugbo ug Mindanao.

Ang mga barkong passenger vessel nga apektado sa suspension order mao ang M/V Asia Indonesia, M/V Asia Japan, M/V Asia Philippines, M/V Asia China, M/V Trans Asia, M/V Trans Asia-II, M/V Trans Asia-3, M/V Trans Asia.

Matud ni Cabatingan ang hearing alang sa show cause order gitakda karun petsa 5 ning bulana adlaw’ng Biyernes sa alas 10:00 sa buntag diha sa rehiyonal nga buhatan sa Marina-7.

Kagahapong adlawa gisugdan sa mga personnel sa MARINA-7 pagsusi sa maong mga barko nga naa sa pantalan sa Sugbo.

Si Julian Sy, ang management representative ug tigpamaba sa Trans Asia Shipping Lines, Inc., sa pakighinabi sa mga tigbalita nagkanayon nga bisan pa og wala gimando sa balaod ang paghatag og hinabang sa mga survivors aduna silay ihatag nga P4,000 matag pasahero.

Kini aron makatabang kanila tungod sa mga butang nilang nangawagtang atol sa hitabo. Base sa balaod ang makalas lamang sa samang trahedya ang adunay madawat nga P200,000 isip compensation gikan sa shipping lines.

Samtang mipasalig kining mokooperar ang ilang kompanya sa imbestigasyon sa Special Board of Marine Inquiry ug mopahigayon og kaugalingong imbestigasyon kung si kinsa sa ilang mga opisyal sa barko ang responsable sa maong trahedya. (BANAT NEWS)