CEBU, Philippines - Ang hepe ug upat niini ka mga sakop sa kapulisan sa lungsod sa Pinamungahan ang mag-atubang og imbestigasyon human gipasanginlan sa usa ka negusyante og kopras nga mikuha sa iyang 100,000 cash sulod sa ilang trak de karga atol sa ilang pagpanimbang og kopras niadtong Lunes sa hapon diha sa barangay Anislag bukirang lugar sa lungsod sa Pinamungahan ug boundary na sa lungsod sa San Fernando.
Si Marcosa Arañas ug Berto Ongkoy nga taga lungsod sa San Fernando ug negusyante og kopras midangop sa miaging gabii sa Provincial Investigation and Detective Management Branch (PIDMB) sa Cebu Provincial Police Office (CPPO) ug mipasangil nga gikuha ang iyang kuwarta sa grupo ni Insp. Leo Logroño uban sa upat ka mga sakop niini.
Subay sa pasangil ni Arañas kalit lang miabot ang mga pulis niadtong higayona ug daw giinggansa nang daan ang ilang dalang armas hinungdan nga mikanaog siya sa sakyanan ug midagan gumikan sa iyang kahadlok.
Apan sa iyang pagbalik sa sakyanan wala na diha ang kwarta nga gibutang sa front seat sa ilang sakyanan.
Si Sr. Supt. Patrocinio Comendador, director sa CPPO nga nahinabi sa mga tigbalita mitug-an nga iyang gitambagan si Arañas nga ipa-blotter sa PIDMB ang nahitabo ug moluwat og formal complaint batok sa grupo ni Logroño.
Matud ni Comendador nga base sa iyang nadawat nga impormasyon miresponde ang maong mga polis sa nadawat nga report kabahin sa mga armadong tawo sa barangay Anislag.
Apan sa pag-abot nila didto sila si Arañas ug Ongkoy nga armado og calibre .45 pistola apan nakapakita sila og dokumento pagdala niini sama sa permit to carry firearms outside of residence (PTCFOR).
Nidugang si Comendador wala makahibawo ang iyang mga sakop nga dunay kwarta sulod sa sakyanan. Si Arañas gikatahong mihulagway nga illegal search ang gihimo sa mga polis. Iyaha hinuong giingnan si Logroño nga atubangon ang reklamo sa negusyante. Samtang mohimo siya og kaugalingong imbestigasyon ug ang resulta iyang iduso ngadto sa Provincial Internal Affairs Service (PIAS) kinsa mao na usab ang mo-forward sa Regional Internal Affairs Service (RIAS).
“Kun mangawat ang pulis og P100,000 dili siguro magpaila,” dugang pa ni Comendador.
Si Logroño sa pakighinabi niini sa Banat News hugtanong mihimakak sa pasangil nga ilang gikuha ang kuwarta sa maong negusyante.
“Ginoo ko! Naka- uniporme intawon mi unya nagpatrol pa, dili sad tawon mi magpakaulaw uy!.. daghan nang tawo naa na sa basketball court sa Anislag sila (Arañas) pero daplin na sa hi-way,” sumala pa ni Logroño.
Matud niya nga regular nga manimbang og kopras si Arañas diha sa naasoy’ng lugar apan nakadawat sila og report nga ang duha ka bata-bata sa negusyante dunay dalang tag-as nga armas nga KG-9 ug shotgun nga gibutang sa front seat sa ilang sakyanan.
“Amo siyang gipakanaog kay ang report naa sa frontseat ang KG-9 ug shotgun,” matud pang Logroño kinsa midugang nga imposible ang pangangkon ni Arañas nga nakadagan siya kay ilaha man daan kining gipalibutan.
Andam hinuon si Logroño nga atubangon ang maong reklamo sa tukmang buhatan. (BANAT NEWS)