Utlang gisampit sa taga Busay

CEBU, Philippines -Ang mga molupyo sa bukirang barangay ning dakbayan sa Sugbo nagtinguha nga kahimoan og lakang sa buhatan sa City Veterinary ang kadaghang iro nga libud-suroy sa maong lugar nga naghatag og hulga gumikan sa rabies.

Si Rene Alquizola, taga Busay Heights Subdivision sa barangay Busay, ning dakbayan   kinsa kanhi manager sa DYMR, sibyaanan sa gobyerno ning dakbayan nanangpit kang Dr. Alice Utlang ang hepe sa City Veterinary office nga mopasikop sa mga 20 kapin ka mga irong libudsoroy sa ilang lugar nga nagpunay og panganak apan walay mga tag-iya nga nag-atiman.

Miingon si Alquizola nga naghatag og peligro ang maong mga iro sa mga molupyo sa maong dapit   kay   anaa kini magpundok kanunay sa may entrance   gate sa maong subdivision ug nag-anam ka daghan tungod kay magpunay lang og panganak.

Matud pa ni Alquizola nga napanid-an niya nga dugay na kaayo kining mga iroa nga gipasagdan sa ilang mga tag-iya ug ang reklamo nila wala hatagi  og pagtagad sa taga City Hall. Maoy hinungdan nga miduol si Alquizola sa Banat News pamasin nga maminaw si Dr. Utlang sa ilang reklamo, ilabi na nga nasayud siya nga dali kaayo kining mohatag og aksyon sa mga suliran nga may labot sa irong libud-suroy.

Mipasalig si Alquizola nga andam siyang mokooperar sa taga City Pound nga mohipos ning mga iroa nga gipasagdan nalang sa ilang mga tag-iya.

Ang laing sulirang   giantos sa taga Busay Heights sulod sa dugay nang panahon, mao ang ka-walay klarong adlaw sa paghakot sa ilang mga basura nga malata ug di-malata.

Si Alquizola kinsa mikandidato sa pagka-konsehal sa lungsod sa Barili sa milabay’ng piniliay miduol sa Banat News pamasin nga ang taga garbage section sa City Hall molihok kun ma-Banatan. (BANAT NEWS)