Dinasmagay 1 patay, 3 angol

CEBU, Philippines - Usa ang nakalas ug laing tulo ang nangaangol dihang ang sakyanan nga ilang giluwanan midasmag, gidaro sa laing sakyanan didto sa eskina sa dalan Plaridel ug dalan Jaime sa barangay Paknaan, dakbayan sa Mandaue sa miaging gabii.

Ang namatay mao si Victoria Canoy, 45 anyos, samtang ang mga   naangol mao ang iyang bana nga si Carmelito Canoy, 55, anyos, ilang 17 anyos nga anak nga babaye nga si Nina Canoy nga pulos taga Zone Kamunggay sa barangay Paknaan, dakbayan sa Mandaue, ug Jessie Joel de Manuel, 26, ulitawo nga taga barangay Jugan sa Consolacion   kinsa kasamtangang gipatambalan sa usa ka pribadong tambalanan sa dakbayan sa Sugbo.

Si PO2 Dante Flores, field investigator sa traffic division sa Mandaue City Police Office (MCPO) nga nahinabi sa Banat News miingon nga si Carmelito nga bana sa namatay maoy nagmaneho sa ilang sakyanan nga may plate number nga GPS 531.

Matud pa ni PO2 Flores nga gikang mitambong og party ang mga biktima sa lungsod sa Consolacion ug paingon na kining mamauli sa barangay Paknaan, dihang    sa pagliko nila sa eskina sa maong dalan paingon sa wala, kalit kining gisungag sa gikasugat nilang pribadong sakyanan nga gimaneho ni Joel Trinidad De Manuel.

Si PO2 Flores miingon nga gumikan sa kusog nga impact sa maong panagbangga, ang sakyanan nga gimaneho ni Canoy nadaro sa gilay-ong 89 metros ug naangin pa ang laing duha ka traysikol nga pulos usab nangagusbat. (WC) (BANAT NEWS)