CEBU, Philippines - Patay ang usa ka gwardya nga nagbantay sa bodega sa usa ka dakong tindahan diha sa dalan F. Gonzales sa barangay Sto. Niño ning dakbayan human pusila sa usa sa duha ka lalaking giingong nangasuko sa dihang wala matarong og tubag sa biktima ang ilang gipangutana sa miaging Domingo sa hapon.
Si William Baldado, 26, lumad nga taga Negros Oriental apan kasamtangan nagpuyo sa barangay Basak San Nicolas ning dakbayan ug sakop sa GDS Security Agency nga nadestino sa maong bodega patay nang daan nga gihatud sa Cebu City Medical Center (CCMC) sa mga sakop sa Mobile Patrol Group (MPG).
Duha ka mga lalaking hubog ang gidakop sa kapolisan ug giimbestigar tungod sa maong hitabo nga giilang sila si Ericson Mainit, 24, ug Juanito Lausa pulos taga sitio Bato sa barangay Ermita ning siyudad. Si PO2 Leroy Baguio sa Homicide Section sa Cebu City Police Office (CCPO) sa pakighinabi sa telepono sa Banat News nagkanayon nga sila si Mainit ug Lausa maoy uwahing nakit-ang gikalalis sa biktima.
Matud pa nga nangutana ngadto sa biktima ang duha kun asa dapita ang Citi Plaza apan giingong wala kini matarong og tubag sa biktima hinungdan nga nainit si Mainit ug mibunot og armas ug gipusil ang biktima. Ang biktima diha naigo sa walang dughan nga maoy gituohang nakaingon sa iyang hinanali nga kamatayon.
“Nangutana kun asa ang Plaza , wa matarong og tubag sa guwardya, gipusil, duna sad nag-ingon nga nanghingi ang mga suspek,” matud pang Bagiuo.
Ang Car 019 sa MPG nga nagpatrolya niadtong higayona maoy unang nakaresponde ug gidali pagdala ang biktima sa CCMC apan nakabsan na kining daan sa iyang kinabuhi.
Human mabulabog ang nahitabo, naglumbaanay sa pagpanagan paingon sa Ermita ang mga suspek hinungdan nga miresponde ang Carbon Police Station sa maong barangay nga miresulta sa pagkasikop sa duha sa ilang mga balay.
Usa ka .357 revolver nga may upat ka buhing bala ug usa ka kabhang nakuha sa posesyon ni Mainit. Ang duha kusganong mihimakak sa pasangil.
Ang duha gipailawom sa paraffin test ug ipa-ballistics test ang armas nga ilang nakuha sa posisyon ni Mainit pagtino kung mao ba kini ang gigamit sa krimen. - (BANAT NEWS)