Imbestigasyon sa nalunod nga barko gi-andam

CEBU, Philippines - Nangatarungan ang Coast Guard Station-Cebu nga gitugutan nila nga makabiyahe ang nalunod nga M/V Asia Malaysia sa kadagatan didto sa Iloilo niadtong Domingo sa buntag tungod kay walay giluwatan nga public storm warning ang Philippine Atmospheric and Geophysical Astronomical Service Administration niadtong Sabado sa gabii.

Ang maong barko nga dunay 168 ka mga sakay apil na ang mga tripulante miggikan paingon sa Iloilo Sabado sa gabii apan pagkabuntag sa Domingo nakasugat kini og dakong bawod ug kusog nga hangin hinungdan sa pagtakilid niini ug nalunod.

Naluwas hinuon ang tanang sakay niini human giduol sa nanglabay usab nga mga barko ug mga sakop sa Bantay Dagat.

Matud sa hepe sa Cebu Coast Guard Commander Rolando Punzalan awtomatikong kanselahon ang mga biyahe niadtong mga barkong ubos sa 1000 gross tons kun may public storm warning.

Hangtud sa paghimo ning balita gipaabot pa sa Cebu Coast Guard ug sa Maritime Industry Authority (MARINA-7) ang marine protest nga iduso sa kapitan sa nalunod nga barko aron kasugdan ang pormal nga imbestigasyon sa maong panghitabo.

Si Punzalan nagkanayon nga nadawat na nila ang pamahayag sa management sa Trans Asia nga nanag-iya                sa nalunod nga M/V Asia Malaysia.

Matud ni Punzalan lakip sa ilang pangayuon unyang dokumento mao ang Passenger Safety Certificate ingon man Mandatory Pre-departure Safety Inspection sa kapitan sa barko.

Ipatawag usab sa pormal nga imbestigasyon ang mga tripulante ingon man pipila ka pasahero aron makahatag og dugang detalye sa kinatibuk-ang panghitabo.

Nunot niini subling gipahimangnoan sa Coast Guard Commander ang publiko ingon man ang tagdumala og barko nga dili mopugos og biyahe karung panahona ilabina kun kusog ang hangin ug dagku ang bawod sa dagat aron paglikay sa dautang panghitabu.   - (BANAT NEWS)