Tulis duol sa police station

CEBU, Philippines - Duha ka tulisang mitulis unta sa usa ka nurse apan nabulabog ang mipusil sa gwardiyang nadestino sa Vicente Sotto Memorial Medical Center (VSMMC) sa niaging alas-10 pasado sa gabii diha sa dalan B.Rodriguez siyudad sa Sugbu.

Ang nahitaboan luyo ra sa buhatan sa Fuente Police Station apan bisan paman niini wala gyud madakpi sa mga pulis ang duha ka wala mailhing tulisan.

Ang biktima giila sa kapulisan nga mao si George Tangayan, 19, taga barangay Bulak sa lungsod sa Dalaguete ug sakop sa GA-Protect Security Agency ug nadestino sa main entrance sa VSMMC.

Si PO2 Leroy Bagiuo sa Homicide Section sa Cebu City Police Office (CCPO) sa pakighinabi niini sa Banat News nagkanayon nga ang duha ka tulisan mitulis unta sa nurse sa VSMMC nga si Claire Diotay, 26, diha sa gawas samtang kini mopauli na unta.

Matud pa ni Bagiuo pag-abot sa biktima sa tungod sa katupad nga Maternity Hospital kalit lang kining giduol sa duha ka mga lalaki ug mideklarar og tulis.

Ang gwardya sa maong tambalanan nga nakakita sa pagpanulis misitar sa mga tulisan hinungdan nga nabulabog ang duha ug wala makuha ang bag sa biktima dayon nanagan.

Sa pagtuo sa duha ka tulisan nga molaban si Tangayan nga niadtong higayona nagbarog diha sa may main entrance sa VSMMC giunhan nila kini sa pagpusil ug naigo diha sa tiyan.

Hinuon si Tangayan luwas ra sa peligro human madapati og tambal apan bisan tabok ra sa karsada ang Fuente Police Station wala madakpi ang mga tulisan. (EIM) - (BANAT NEWS)