Kargador gilapsan sa bala namatay

CEBU, Philippines - Namatay ang usa ka 21-anyos nga kargador human lapsi sa bala nga gikan sa armas sa kauban niyang kargador nga miunay sa pagpusil kaniya didto sa dalan M.C. Briones, barangay Ermita, dakbayan sa Sugbo sa miaging gabii.

Ang biktima mao si Henegreg Fagalan, 21, ulitawo, nga taga sitio Santa Lucia, barangay Tinago, dakbayan sa Sugbo, samtang ang suspek nailhan lang sa ngalang Jumbert, nga kargador usab sa merkado sa Carbon.

Sumala sa kapolisan nga sa wala pa mahitabo ang pagpamusil si Fagalan naglakaw sa lugar nga nahitaboan kay nangita og kargahonon. Ang suspetsado nga didto usab sa maong dapit misenyas sa biktima nga paduolon kaniya (suspek) nga gisanong usab dayon ang biktima.

Apan   dihang didto na kini atubangan sa suspek, kalit lang milanit sa iyang armas de fuego ang naulahi, nagmaoy hinungdang mihana og dagan si Fagalan.

Apan wala kini molampos sa pag-ikyas kay nalamba siya human masabak sa usa ka bala ang iyang buko-buko nga milapos sa tuong bahin sa iyang dughan nga maoy hinunghdan sa hinanali niyang kamatayon. 

Nagduda ang kapolisan nga may personal nga kalagot ang suspek ngadto sa biktima nga maoy hinungdang iya kining gipatay. Gipangita pa sa kapolisan ang suspetsado human kini mosibat. - Brenda D. Batuto ug Ryan Christopher J. Sorote sa The Freeman/WC (BANAT NEWS)