Gov. misusi sa Arts Center

CEBU, Philippines - Gisusi ni Gobernador Gwendolyn Garcia ang Cebu Performing Arts Center (CPAC) nga karon gitawag na og Sugbo Performing Arts Center, aron sa pagtino sa kahimtang sa maong edipisyo.

Buot   sa gobernador nga masiguro ngadto sa contractor sa maong proyekto nga mahingpit na ang pagpa-anindot ug pagpalig-on niini kay pagabuksan na kini karong Agosto 12.

Gitug-an sa gobernadora nga gikinahanglan nga buksan na gyud ang maong proyekto karong sunod nga bulan bisan pa kun dili ni mahuman apan iyang ipakita sa mga bisita ang maong proyekto nga wala humana sa kontraktor.

Matud pa sa gobernador nga ang maong edepisyo pagatawgan na usab og Sugbo Performing Arts Center (SPAC) kay nag-inusara pa lamang kini dinhi sa sa Sugbo ug sa tibuok Kabisay-an. Ang SPAC adunay 1,600 ka seating capacity ug pagagamiton kini sa mga nagkadaiyang mga kalihukan pangkultura ilbina sa pagpresentar ug pagpreserbar sa karaang tradisyon sa mga Sugbuanon, opera, concert ug uban pa.

Midugang usab si gobernador nga ang SPAC dili kakompetensya sa Cebu International Convention Center (CICC).

Nunot niini gibutyag usab sa gobernador nga dugay nang gilusad ang kasabutan sa University of the Philippines (UP) Cebu Campus ug sa probinsya sa Subgo nga ang kagamhanan sa probinsya sa Sugbo maoy modumala niining maong edipisyo.  - BANAT NEWS