Debate sa RH Bill himuon karong adlawa

CEBU, Philippines - Bisan pa og wala sila’y ipahigayong lihok karong adlawa, ang Archdiocese sa Sugbu miklarong ilang tutukan ang isyu sa Reproductive Health (RH) Bill nga debatihon karong adlawa sa hawanan sa Senado. Karong adlawa gitakda ang debate sa RH Bill nga pangulohan ni Sen. Miriam Defensor Santiago ug Sen. Pia Cayetano isip mga principal sponsors sa RH Bill.

Usa sa mga punto nga pangusgan ni Cayetano mao ang kamahinungdanon sa RH Bill o Senate Bill No.2865 sa mga kababayen-an ilabi na ngadto sa mga inahan lakip na sa ilang mga bag-ong gipanganak.

Didto sa kaulohan, gipaabot nga magdungan paglusad og nagkadaiyang rallies ang mga anti ug pro RH Bill groups.        

Apan dinhi sa Sugbu, giklaro sa Archdiocese nga wala’y kalihukang susama niini apan kanunayon nila ang ilang pagpasabot sa mga katoliko kabahin sa maong balaudnon.

Niadto lang miaging Hulyo 23, kapin sa dos mil ka mga tawo ang mitambong ka kalihukan batok sa Reproductive Health Bill nga gipahigayon sa Basilica Minore del Sto.Niño Pilgrims Center.

Si Msgr. Esteban Binghay, episcopal vicar sa Artsidiyosisis sa Sugbo namahayag nga kun mamugos gyud ang mga magbabalaod nga mapasar ang maong balaudnon, kinahanglan nga amendahan ang pipila ka probisyon niini.

 “Dili gusto ang simbahan nga ma-divided ang atong nasud tungod ani nga isyu maong mihangyo mi og amendments ug himuon ang RH bill nga morally objective,” matud pa ni Binghay.

Apan kun ipasar kini nga walay amendment, mipasidaan si Binghay nga dili makalaom ang mga magbabalaud nga tahuron kini (RH Bill).

Lakip sa mga probisyong buot paamendahan sa simbahan mao ang mga nagtudlo sa aborsyon.  - BANAT NEWS